Madaxweyne Axmed Siilaanyo Oo Isku Badel iyo Magacaabis Ku Sameeyey Wasaaradaha Dawladda iyo Hay'adda Qaranka Qaar Ka Mid Ah

Saddex masuul oo loo magacaabay xilal cusub iyo laba agaasime guud oo laysku badelay iyo maareeye xilkii laga qaaday

Hargeysa (Warsugan) Madaxweynaha Somaliland Mudane, Axmed Siilaanyo ayaa isku badal ku sameeyey qaar ka mid ah agaasimayaasha guud ee wasaaradaha dalka, halka uu xilkii ka qaaday maareeyihii hore ee Hay'adda abaabulka ka saarka qaranka (NDC) Jamaal Caydiid Ibraahim, sidoo kalena wakiil cusub u magacaabay safaaradda ay Somaliland ku leedahay Itoobiya.

Madaxweynuhu wuxuu wasiiru dawlaha wasaaradda qorshaynta u magacaabay wakiilkii hore ee itoobiya u fadhiyey Somaliland Maxamuud Aaden Jaamac Galaal, Waxaanu isku badelay laba agaasime guud. Halka Aadan Muuse Jibriil loo magacaabay wakiilka Itoobiya ee Somaliland. War-saxaafadeed uu ku saxeexan yahay afhayeenka madaxtooyadda Somaliland mudane, Cabdiraxmaan Sh. Cilmi Fahiye (Shamax)

ayaa lagu yidhi "Madaxweynaha Jamhuuriyadda Somaliland Mudane Axmed Maxamed Siilaanyo waxa uu digreeto madaxweyne oo summadeedu tahayJSL/M/XILQ/249/1-3881/022016 uu magacaabid, isku-bedel, iyo Xilka qaadis ku sameeyey qaar ka mida Masuuliyiinta laamaha kala duwan ee Xukuumadda.

Madaxweynuhu:-

Markuu Arkay:                          Qodobka 90aad, Faqradiisa 2aad ee Dastuurka Jamhuuriyadda Somaliland;

Markuu Tixgeliyey:                   Ahmiyadda weyn ay Wasaaraduhu u leeyihiin Dalka iyo dhismaha Qaranka;

Markuu Arkay:                          In baahi loo qabo buuxinta jagada Wasiiru Dawlaha Wasaaradda Qorshaynta Qaranka iyo Horumarinta ee Jamhuuriyadda Somaliland;

Markuu Ka Fiirsaday:               Kartidiisa, aqoontiisa iyo hufnaantiisa shaqo;

Markuu ku Qancay:                  In uu hanan karo xilkan loo magacaabay;

Wuxuu go’aansaday

In Mudane, Maxamuud Aaden Jaamac Galaal, laga bilaabo taariikhda maanta uu ahaado Wasiiru Dawlaha Wasaaradda Qorshaynta Qaranka iyo Horumarinta ee Jamhuuriyadda Somaliland. (Bedel Wakiilkii hore Somaliland u fadhiyey Itoobiya).

Ø MAGACAABIDDA WAKIILKA CUSUB EE ITOOBIYA:

Madaxweynuhu:-

Markuu Arkay:                          Qodobka 90aad, Faqradiisa 3aad, Xarafka (r) ee Dastuurka Jamhuuriyadda Somaliland;

Markuu Tixgeliyey:                   Ahmiyadda Wakiilada Somaliland u fadhiya dalalka dibeddu u leeyihiin dhismaha Qaranka;

Markuu Arkay:                          In baahi loo qabo buuxinta jagada Wakiilka Jamhuuriyadda Somaliland u fadhiya Dalka Itoobiya;

Markuu Ka Fiirsaday:               Kartidiisa, aqoontiisa iyo hufnaantiisa shaqo;

Markuu Ku Qancay:                  In uu hanan karo xilkan loo magacaabay;

Wuxuu go’aansaday

In Mudane, Aaden Muuse Jibriil, laga bilaabo taariikhda maanta uu ahaado Wakiilka Jamhuuriyadda Somaliland u fadhiya Dalka Itoobiya.

Ø ISKU BEDELKA AGAASIMEYAASHA GUUD:

Madaxweynuhu:-

Markuu Arkay:                          Qodobka 90aad, Faqradiisa 3aad, Xarafka (kh) ee Dastuurka Jamhuuriyadda Somaliland;

Markuu Tixgeliyey:                   Ahmiyadda ay Agaasimayaasha Guud ee Wasaaraduhu u leeyihiin dhismaha Qaranka;

Markuu Arkay:                          In baahi loo qabo buuxinta jagada Agaasimeyaasha Guud ee Wasaaradaha Kalluumaysiga iyo Khayraadka Badda iyo Agaasimaha Guud ee Xannaanada Xoolaha ee Jamhuuriyadda Somaliland;

Markuu Ka Fiirsaday:               Kartidooda, aqoontooda iyo hufnaantooda shaqo;

Markuu Ku Qancay:                  In ay hanan karaan xilalkaa loo magacaabay;

Wuxuu go’aansaday

1. In Dr. Jaamac Maxamed Odowaa, laga bilaabo taariikhda maanta uu ahaado Agaasimaha Guud ee Wasaaradda Kalluumaysiga iyo Khayraadka Badda ee Jamhuuriyadda Somaliland. (Bedel Agaasimihii Guud ee hore ee Wasaaradda Xannaanada Xoolaha)

2. In Mudane, Cabdi Axmed Nuur (Cabdi Gurey), laga bilaabo taariikhda maanta uu ahaado Agaasimaha Guud ee Wasaaradda Xannaanada Xoolaha ee Jamhuuriyadda Somaliland. ( Bedel Agaasimihii Guud ee hoe ee Wasaaradda Kalluumaysiga iyo Khayraadka Badda)

Ø MAGACAABIDDA GUDOOMIYE KU-XIGEENKA HAY’ADDA SHAQAALAHA DAWLADDA:

Madaxweynuhu:-

Markuu Arkay: Qodobka 90aad, Faqradiisa 3aad, xarafka (j) ee Dastuurka Jamhuuriyadda Somaliland;

Markuu Tixgeliyey: Ahmiyadda ay Hay’adda Shaqaalaha Dawladdu u leedahay dhismaha Qaranka;

Markuu Arkay: In baahi loo qabo buuxinta jagadda Gudoomiye Ku-xigeenka Hay’adda Shaqaalaha Dawladda;

Markuu Ka Fiirsaday:               Kartidiisa, aqoontiisa iyo hufnaantiisa shaqo;

Markuu Ku Qancay: In uu hanan karo xilkan loo magacaabay;

Wuxuu go’aansaday

In Mudane, Maxamuud Cabdillaahi Xarbi, laga bilaabo taariikhda maanta uu ahaado Gudoomiye Ku-xigeenka Hay’adda Shaqaalaha Dawladda ee Jamhuuriyadda Somaliland.

Ø Magacaabidda & Xilka Qaadista Maareeyaha Hay’adda Abaabul ka saarka Qaranka (NDC)

Madaxweynuhu:

Markuu Arkay: Qodobka 90aad faqradiisa (3)aad, xarafka (kh)  ee Distoorka Qaranka,

Markuu Tixgeliyey: Ahmiyadda ay Hay’adda Abaabul Ka Saarka Qaranku   u leedahay Dhismaha Qaranka,

Markuu Arkay: In baahi loo qabo buuxinta Jagadda Maareeyaha Hay’adda Abaabul ka saarka Qaranka.

Markuu Ka Fiirsaday: Kartidiisa, aqoontiisa iyo hufnaantiisa shaqo,

Markuu ku qancay: in uu hanan karo xilkan loo magacaabay.

Wuxuu go’aansaday

In Mudane, Ibraahim Axmed Raabi, laga bilaabo taariikhda maanta uu ahaado Maareeyaha Hay’adda Abaabul ka saarka Qaranka (NDC) ee Jamhuuriyadda Somaliland.

Ø Ujeeddo: Xil-ka Qaadis

Ku:       Mudane, Jamaal Caydiid Ibraahim                                                        

            Maareeyihii Hore ee Hay’adda Abaabul ka saarka Qaranka (NDC)       

Mudane,

Waxaan kaaga mahadinayaa mudadii aad soo haysay xilka Maareeyaha Hay’adda Abaabul ka saarka Qaranka (NDC). Xilalka Qaranka ayey dabcigeed tahay in ay meerto noqoto oo kolba cid hanan karta loo dhiibo.

Sidaas darteed, waxaan gartay in aan kaa qaado xilka Maareeyaha Hay’adda Abaabul Ka Saarka Qaranka Jamhuuriyadda Somaliland (NDC).

Haddaba, waxaan kaa rajaynayaa in aad si niyad sami ah ugu wareejiso xilka aad haysay  Mudane, Ibraahim Axmed Raabi oo aan xilkaa isaga ah u magacaabay.

ALLAA MAHAD LEH

Cabdiraxmaan Sh. Cilmi Fahiye (Shamax)

         Af-hayeenka Madaxtooyada JSL.          

Eng Faysal Cali Waraabe Oo Xukumadda Ugu Baaqay Inay Talaabo Degdeg Ah Ka Qaaddo Dhul Balaadhsi Maamulka Puntland Wado

Hargeysa(Warsugan) Hoggaamiyaha xisbiga mucaaradka ah ee Ucid, Eng Faysal Cali Waraabe, ayaa sheegay in maamulka Puntland bilaabay qorshe dhul balaadhsi oo ay ugu soo fidayaan Somaliland. Waxa uu ka hadlay dagaal dorraad dhexmaray ciidamada qaranka Somaliland iyo kuwa maamulka Puntland oo sababay dhimashada qof shacab ah.

Eng Faysal ayaa tilmaamay in maamulkaasi Bariga Somaliland hadimo ku hayay muddooyinkii uu jiray islamarkaana gobollada Sool iyo Sanaag Bari ka dhigay dhul lagu muransan yahay. Arrintaasi oo dib u dhigtay hawlaha dawladnimo ee gobolladaasi laga hirgalin lahaa, sidoo kalena beesha caalamku halkaasi u aragtay dhul muran ka taagan yahay.

“Kaantaroolkii u dhexeeyay Somaliland iyo Somalia ee Garoowe 6Km u jiray ayaa la soo qaaday oo hadda 30Km ayuu gudaha ugu jiraa Somaliland. Hal qof oo shacbiga Somaliland ah oo ka hor tagayay dhulfidsigaasi ayaa ku dhintay. Dadkii reer Sool jeclaa ee odhan jiray maxay Somaliland u noqon waayeen, maanta ayay inoo baahan yihiin, qarannimadeeniina khatar bay ku jirtaa, shacbigeenii khatar buu ku jiraa oo dhul fidsi baa la bilaabay. Xudduudii garoowe ayaa la soo durkinayaa, sababtoo ah halka xadkeenu maro iyo madaxtooyada Puntland waxay isku jiraan ilaa saddex Kilomitir,” ayuu yidhi Eng Faysal.

Guddoomiyaha xisbiga Ucid wuxuu xukumadda u soo jeediyay inay tallaabo ka qaaddo qorshaha Puntland “ Waxaan leeyahay xukumadda arrintaas jirta waa inay si dhakhso ah uga jawaabtaa. Shacbiga reer Somaliland waxaan leeyahay waa in la garab istaagaa shacbiga reer Sool. Waxaa suurto gashay wixii baryahaba la sheegayay ee la lahaa nimankani dhul fidsi ayay wadaan ayaa suuro gashay oo ay si cad uga badheedheen.

Hadalka Faysal Cali Waraabe ayaa ku soo beegmaya xilli maalmihii u dambeeyay bulshada gobolka Sool degtaa si weyn uga cadhaysan yihiin qorshaha maamulka Puntland ku soo durkiyay kaantaroolkiisa, islamarkaana dagaallo ka dhaceen degaanka Dixin oo laga dhigayo barta kaantarool. Waxgaradka Sool ayaa sheegaya inay duulimaad dhul balaadhsi u arkaan qorshaha maamulka beelaysan ee Puntland ku soo qaaday dhulkaasi.

Xildhibaan Nac-nac Oo Noqday Xildhibaanka Kaliya Ee Booskiisa Waxqabad Ee Golaha Wakiiladda In Lagu Tartamo 11 Sano Kadib

Hargeysa (Warsugan) Xildhibaan Axmed Diiriye (Nac-nac) oo ka mid ah 82 Xubnood ee ka tirsan Golaha Wakiilada Somaliland ayaa si weyn uga dhex muuqday mudooyinkii uu ka tirsanaa Aqalka golaha wakiilada.

Xildhibaanka oo ku sifoobay dhinaca adeegyada bulshada ha noqoto wadooyinka ama taakulada dadka jilicsan ee uu inta badan ka caawiyo dhanka quudinta cuntooyinka, dhismaha hoy ay ka galaan dhaxanta, cadceeda, iyo dibedyaalnimada ayeynu ku so qaadan doonaa qormadan maanta.

Hadaba Xildhibaan Nac-nac muxuu ka dhaxlay arrimaha taakulada bulshadiisa uu u fidiyo, aynu yara jaleecno kuna daadegno doorkaa uu ka dhex muuqday xildhibaanku oo ah mid waajib ku ah, ahaydna sababihii loo soo doortay xildhibaanka balse waxa u dheer oo maanta shaqsi walba oo ka mida bulshada Somaliland guclo ugu jiraa sidii uu ku noqon lahaa nac-naca golaha danbe ee la soo dooran doono, sababta oo ah waxa in dhawaydba dhegaxa bulshada ku soo noq-noqota, marka lagu kulmo munaasibadaha uu Madaxweynaha Qarankuna joogo, mudane Madaxweyne waxa aanu iska soo dooranayn Hebel oo noqon doona Nac-naca noo qaabilsan waddo heblaayo bilowgeeda ama Mudane Madaxweyne markaanu aragnay in aanay wadadaasi ka maarmayn in aanu u helno nac-nac oo kale waxa aanu dib isugu noqonay in aanu hebel u garano nacnac noo dabataagnaada hawlahaasi iyaga ah, taas oo ay ugu danbaysay wakhti uu madaxweynuhu dhagax dhigayey wadada isku xidha burco iyo hargeysa oo ay sulaadiin ka mida dadkii hawshaasi faraha ku hayey ay isku magacaabeen xilkaa nacnac madaxweynuhuna uu sidaasi ula socdo.

Taas waxa aan u soo qaatay oo ay daliil cad u tahay in xildhibaankaasi yahay xildhibaan la majiirtay oo la qiray kartidiisa iyo dedaalkiisa muwaadinimo, balse aynu u baahanay in qof walba kaga daydo dedaalka iyo taakulada bulshadiisa.

Goobo badan oo bulshadu ku kulanto ayaa kafta ugu badani yahay war hebel ma nacnac ayaad noqotay mise waad iska dhigaysaa, iyadoo looga danleeyahay uun waxbaad qaybisay ama dad baahan ayaad ka hadlaysaa,

Hadaba isku soo wada duuboo muhiimada iyo mudnaanta ku jirta arrimahaas ayaa ah in dadkeenu yihiin kuwo ka dhego xidhan wanaaga ama samafalka ay tahay in aynu ugu tabarucno walaaleheena baahan ee darxumada iyo diiftu saamaysay kuna dhaqan gobolada dalka.

Sidoo kale xildhibaanku waxa uu xil weyn iska saaray bilicda caasimada Somaliland oo uu ku soo kordhiyey wadooyin la odhan karo waa wadooyinkii u horeeyey ee qof aan ka tirsanayn Golaha Deegaanka, ha noqdo maayar ama maayar ku xigeen iyo Xoghaye tooni uu hindiso inuu dhamaystiro waddo muhiima oo caasimada waxbadan ku soo kordhisay.

Waxaana mid loo baahan tahay in aynu wax kaga dayano oo aynu muujino kaalinteena muwaadin-nimo inaga oo garab iyo gaashaan la barbar istaagayna dawlada hoose ee caasimada Somaliland ama Gobolada kaleba ee aynu maanta culayska ku saarno inay keligeed wax ka qabato arrimaha magaaladu la ciir ciirayso ee dhinaca bilicda la xidhiidha, hadiise sidaa xildhibaan nacnac aynu meel uga soo wada jeedno danta qaranka iyo ta shacbiga waxa hubaala in aynu berina la iman doono kaalin muhiima oo aynu madaxweyneyaasha ka caawino si ay dalkooda horumar ugu hogaamiyaan ama u horseedaan.

Saraakiisha Somaliland Oo Wacad Ku Maray Inay Garoowe Soo Taaban Doonaan Haddii Puntland Soo Xadgudubto

Laascaanood (Warsugan) Saraakiisha ciidanka qaranka ee Gobolka Sool ayaa wacad ku maray inay soo taaban doonaan gudaha magaaladda Garoowe, waxaanay farriin u direen maamulka Garoowe iyagoo ugu baaqay inay dib uga gurtaan degaanadda ay faraha la soo galeen. "Aniga oo ah taliyaha ciidanka gobolka Xaysimo Taleex magacayaanaga la yidhaahdo Cabdisalaan Yuusuf Muuse ( Cabdisalaan Siigaale) waxaan u digayaa maamulka Punltand oo ay hormuud ka yihiin Ciise Maxamuud (Qabiil) ee ay ku soo duuleen meesha la yidhaahdo Bixin iyo Wow oo ay ka samaynayaan degaan, waxaan uga digaynaa maamulka Puntland inay si deg deg ah baxaan, haddii ka bixi waayaana waxaan u sheegaynaa in talaabo deg deg ah oo kama danbays ah in aanu ku soo qaadanayno haddii aanay maamulka Puntland si deg deg ah u bixin inay jawaabteeda helayaan"

" Anigu waxaan ahay sarkaal ka tirsan ciidanka qaran, kana imi jiida Boocame soona indha indheeyey ee uu boobayo ninka la yidhaahdo Ina Farweyne ee ay ku boobayaan maamulka, waxaan leeyahay ka noqon nin aqal muraayad ah ku jiraa ma shiido nin aqal cariish ah ku jiraa, waxaan ku leeyahay ka noqo weynu isugu imanaynaa, Walaahi waa la seexan waayi Garoowe, dib uga noqda oo ka gurtay oo yeynaan galabta isugu iman" Sidaas waxaa yidhi sarkaal kale oo ka tirsan ciidanka qaranka gaar ahaana Boocaame

Madaarrada Kenya Oo Heegan Ka Galay Weerarro Qorshaysan Oo Al-Shabaab La Damacsan Tahay Madaarrada Mambasa iyo Nayroobi

Nairobi(Warsugan) Booliska Kenya ayaa Isniintii shalay la galiyay heegan sare kadib markii hay’addaha sirdoonku ka war heleen weerarro argagixiso oo lala damacsan yahay madaaradda diyaaraddaha ee Kenya. Madaxda garoomada diyaaraddaha ayaa la siiyay digniin la xidhiidha inay ka tabaabushaystaan weerarro qorshaysan oo la mid ah kii diyaaradda Daalo ku qabsaday magaalada Muqdisho.

Warqad qoraal ah oo loo diray maamullada madaaradda Kenya ayaa lagu sheegay in koox Al-shabaab ka tirsan loo tababarayo weerarro qorshaysan oo ay ka fuliyaan madaaradda Kenya, iyagoo damacsan inay hawada ku qarxiyaan duullimaadyada ka haada madaaradda Nairobi ama Mambasa. Waxaa lagu wargeliyay maamullada inay arrintaasi ka tabaabushaystaan.

Warqadda digniinta ah oo ku taariikhaysan 26-kii February, kuna saxeexan yahay maareeyaha hay’adda amniga madaaradda Kenya Mr Eric Kiraithe ayaa lagu sheegay in Somalia lagu barayo koox fulinta hawlgallada la xidhiidha sidii hawada diyaarad loogu qarxin lahaa, iyadoo marka hore laga raacay madaarka “Koox 11 naftii hure ah ayaa tababar uga socdaa gudaha Somalia, tababarkaas oo ku saabsan hawlgallada ismiidaaminta hawada, waxayna diyaar u yihiin weerarrada. Shan hawlgal waxaa lala beegsanayaa garoonka caalamiga ah ee Jomo Kenyatta ee Nairobi ama madaarka Wilson Airport, halka inta kale lagu bartilmaameedsan doono garoomada gobolka Xeebta, garoonka caalamiga ah ee Moi.

Mr Eric Kiraithe waxa uu intaasi ku daray in ujeedada weerarradan Al-shabaab qorshaysay yihiin sidii loo dhaawici lahaa ammaanka qaranka Kenya iyo sidii khalkhal loo galin lahaa hannaanka shaqo ee madaarada “Weerarrada Al-shabaab qorshaysay ee ka dhanka ah Kenya waa kuwo lagu curyaaminayo hawlgallada sida muhiimka ah u nidaamsan iyo khalkhalinta ammaanka qaranka ee cagaha ku taagan,” ayuu yidhi Eric.

Digniinta madaarada Kenya heeganka lagu galiyay ayaa imanaysa todobaado kadib weerarkii diyaaradda Daalo lagula beegsaday magaalada Muqdisho, taasi oo iyadoo hawada ku jirtay 15 mirir qarax ka dhacay. Baadhitaannada ayaa lagu ogaaday in naftii hore ahi diyaaradda oo Jabuuti ku wajahan raacay balse lama oga halka qaraxaasi ku jahaysnaa, balse ninka qaraxa lagu tuhunsan yahay ayaa kaligii qaraxu kala baxay diyaaradda, halka laba qof oo dhaawacmay mooyee todobaataneeyo diyaaradda saarnaa si nabad ah ugu soo noqdeen madaarka Muqdisho.

Wasaaradda Macdanta iyo Tamarta Somaliland Oo Markii U Horaysay Tababaraysa Isuduwayaasha Gobollada Ee Wasaaradda

Hargeysa(Warsugan) Masuuliyiinta wasaaradda macdanta iyo tamarta Somaliland ayaa markii u horaysay tababar u furay isu duwayaasha wasaaradda ee gobollada dalka. Wasiirka wasaaradda Xuseen Cabdi Ducaale ayaa furay tababarkaasi oo Hargeysa uga soconaya muddo saddex cisho ah. Wasiiru dawlaha wasaaradda, Aggaasimaha guud, Afhayeenka wasaaradda, madaxa maamulka iyo masuuliyiinta kale ee wasaaradda ayaa goob joog ka ahaa furitaankii tababarka masuuliyiinta laamaha wasaaradda ee gobollada oo kor loo qaadayo aqoontooda maamulka iyo shaqada ay u igman yihiin wasaaradda.

Wasiir Xuseen Cabdi Ducaale oo furitaankii kulanka la hadlay Isuduwayaasha ayaa tilmaamay qodobada xoogga lagu saari doono tababarkan saddexda cisho ah “Tababarkani wuxuu soconayaa saddex cisho. Waxa aanu ugu talo gallay inaanu hawsha aad gobollada u joogtaan idinka tayaynno oo idin siinno macluumaad dhammaystiran oo aad ku hawlgashaan. Tababarkani waxa weeye in si fiican la idiinka dhaadhiciyo sida waaxyaha maamulka ee gobolladu u shaqeeyo, si idinkoo hawshiinna dawliga ah fahansan shaqaddiina uga soo baxdaan. Waxaa la idiin sharrixi doonaa hawlaha maamulka haddii ay maamul noqoto, hadday maalidda iyo xisaabaadka noqoto iyo hadday shaqaalaha noqotaba, markaa waxaanu doonaynaa in aad halkan ka baxdaan idinkoo waxyaabo badan fahansan,” ayuu yidhi wasiirka macdanta iyo tamartu.

Wasiirku waxa uu sidoo kale u sheegay isu duwayaasha in masuuliyadda wasaaraddu tahay macdanta, tamarta(korontada) iyo shidaalka loona baahan yahay inay saddexdaasi hawlood si fiican uga hawlgalaan “Waxaanu doonaynaa inaanu si culus idin hawl gallinno oo saddexdaas qaybood ee wasaaraddu masuulka ka tahay aad ka hawl gashaan oo imika aad moodo hawl badan inaanay ka socon laakiin aanu doonayno inaanu dardar gallinno. Waxa ugu weyn waxa weeye macdanta oo meel walba dalkii si sharci darro ah loo wado ee dad badan waxay wadaan ba la ogayn, waxaas oo dhan waxaa la doonayaa in gobollada masuul ka tihiin ciddii macdan soo saaris ka waddaa aanay shaqo qaban haddaanay idinka idin soo marin,” ayuu yidhi wasiirku.

Wasiirka macdanta oo hadalkiisa sii wata ayaa tilmaamay inay shaqaalaha iyo xafiisyada wasaaradda ee gobollada tayaynayaan “Waxaanu doonaynaa in waxyaabaha aad baahida u qabtaan ee gawaadhidu ka mid tahay, ee xafiisyo ka mid yihiin, ee qalabkii xafiisyada iyo kombiyuutarradii ka mid yihiin intii tamartayadu tahay ee kharashkayagu noo saamaxayo inaanu idinka kabno, oo noqotaan xafiis shaqaynaya oo maamul leh,” ayuu yidhi wasiir Xuseen Cabdi Ducaale.

Cabdiraxmaan Axmed Ismaaciil, wasiiru dawlaha wasaaradda Macdanta iyo Tamarta ayaa isna si kooban ula hadlay isu duwayaasha wasaaradda “Isu duwayaasha gobolladu aad iyo aad bay wasaaradda muhiim ugu yihiin, waayo? Waa gacmihii gaadhayay meesha aanay wasaaraddu gaadhayn. Waa kuwii xogta soo ururinayay, sidaasi awgeed waa inay noqdaan dad tayo leh, garanaya waxay qabanayaan, xidhiidh joogta ahna la leh wasaaradda. Aad baanu uga doodnay sidii la idiin xoojin lahaa, wasaaraddu waxay tamar leedahayna way idin taageeraysaa, idinna ka faa’iidaysta maalmaha tababarkan socdo, soona gudbiya wixii aad tabanaysaan,” ayuu yidhi wasiiru dawluhu.

Maxamed Mixille Boqorre, guddoomiyaha hay’adda shaqaalaha dawladda ayaa isna kulankaasi ka hadlay waxaanu madaxda wasaaradda ku bogaadiyay tababarka ay siinayaan laamaha gobollada “Aad bay u fiican tahay inaad hagaajisataan maamulkii gobollada, shaqaalana inaydaan haysan baan u malayn, haddaad shaqaale yeelataan shaqaalaha xuquuqdooda waa la ilaalinayaa laakiin, shaqada inuu ka maqnaado looguma dulqaadanayo. Shaqaalaha qof walba Fayl ayaad u samaynaysaan, kaas oo ay ku xusan yihiin goorta shaqada la qoray, darajada iyo mushaharka uu qaato,” ayuu yidhi guddoomiyaha hay’adda shaqaaluhu

.Isagoo hadalkiisa sii wata waxa uu isu duwayaasha ku dardaaray inay kordhiyaan aqoontooda islamarkaana ka faa’iidaystaan khibradda wasiirka macdanta iyo tamartu u leeyahay hawlaha ay qabanayaan “Inta uu wasiir Xuseen idinla joogo ka faa’iidaysta, waar cilmi buu hayaaye ka barta macdanta iyo tamarta cilmiga uu ka hayo, ka faa’iidaysta intaas uu idinla joogo oo buug buu kolay idiin soo diriye akhrista. Kordhista aqoonta macdanta iyo tamarta,” ayuu yidhi mudane Mixille.

Isbahaysiga Kulmiye Oo Wada Hadalka Ucid U Socda Iyo Kulamo La Sheegay Inay La Yeelanayaan Masuuliyiinta Waddani

Hargeysa(Warsugan) Afhayeenka garabka isbahaysiga Kulmiye la baxay Xuseen Axmed Caydiid, ayaa tilmaamay inay wali hubinayaan kala doorashada xisbiyada mucaaradka ah ee Ucid iyo Waddani, kuwaasi oo ay wada hadallo kala gooni ah la leeyihiin. Garabka ayaa hore wada hadal ula furay hoggaanka xisbiga Ucid, halka ay shaaciyeen inay maalmaha soo socdana la fadhiisan doonaan hoggaanka Waddani.

Isbahaysiga Kulmiye ayaa hore kulammo ula yeeshay masuuliyiinta ugu saraysa xisbiga mucaaradka ah ee Ucid, kuwaasi oo lagaga arrinsanayay sidii ay xisbiga ugu soo biiri lahaayeen. Afhayeenka isbahaysigu wuxuu sheegay in wada hadalka Ucid sii socon doono “Guddoomiyaha iyo masuuliyiinta kale ee Ucid waanu la wadaynaa wada hadallada, guddi baanu u saaray garabka isbahaysigu,” ayuu yidhi Xuseen Axmed Caydiid.

Geesta kale wuxuu bulshada u iftiimiyay in maalmaha soo socda ay kulammo ibo fur u ah wada hadal la yeelan doonaan hoggaanka Waddani “Waxaanu umadda ku wargelinaynaa inaanu wada hadallada uga gudbi doono xagga Waddani, waxaanan idiin sheegayaa inaanu ballanqabsanayno guddoomiyaha Waddani iyo raggiisa oo aanu iskugu imanaynno kulankii koowaad. Ballankaasi wuxuu dhici doonaa barri ama saadambe, maalmaha soo socdana kulankaasi wuu qabsoomi doonaa marka goobta uu ku qabsoomayo la isla qaato,” ayuu yidhi Xuseen.

Afhayeenka Isbahaysigu wuxuu bulshada xasuusiyay sababta ay uga tageen xisbigoodii Kulmiye “Garabkan Kulmiye waxay xisbigii Kulmiye isku qabteen waad garanaysaan. Mabaadiidii xisbigu ku aasaasnaa ee wada tashiga iyo ku dhaqanka xeerka xisbiga ahaa in xisbiga intiisii ku hadhay khilaaftay oo jabisay ayay ahayd, markaa haddii mabaadiidii xisbigu burbureen oo fadhiyadii hay’adduhu qabsoomi waayeen waxaanu iska hubsanaynaa xisbiga kale eel eh mabaadiidii aanu kula shaqayn lahayn.”

Isaga oo sii hadlaya wuxuu tilmaamay qodobada guddidoodu ka eegayso xisbiga ay ku biirayaan “Maaha qof xisbigu, maaha magac khalliya, xisbigu waa inuu mabaadii yeeshaa. Mabaadiida ayaanu eegaynaa, wixii aanu ku biirin karno mabaadiida ayaanu eegaynaa, dabeedna marka gorgortankaasi dhammaado iyo wixii xisbinimo lagu wada noqon karo ayaa garabku iskula soo noqonayaa talo uu ku go’aan gaadho halka uu geediga u rarayo,” ayuu yidhi Xuseen.

Garabkan ayaa hore uga dareeray xukumadda Siilaanyo iyo xisbigeeda Kulmiye kadib markii la isku afgaran waayay hannaanka loogu tartamayo shirkii golaha dhexe ee qabsoomay 10-kii November sanadkii hore. Waxay si weyn u saluugeen musharaxiinta Kulmiye loogu cumaamaday doorashada 2017-ka, iyagoo hadda u muuqda inay si rasmi ah uga rajo dhigeen in Kulmiye ay ku laabtaan.

Musharrax Cabdimajiid Sh. Maxamed Ibraahim (Janno-galle) oo Shaaciyey Hankiisa Siyaasadeed Ee Ku Wajahan Doorashada Golaha Wakiilladda

Hargeysa (Warsugan) Muwaadin Cabdimajiid Sheekh Maxamed  Ibraahim (Cabdi-majiid Jannagalle) oo kamid ah ganacsatada Aqoonyahanka ah ee reer Somaliland gaar ahaanna reer Hargeysa ayaa si rasmi ah u shaaciyey hankiisa musharraxnimo ee ku wajahan doorashada golaha wakiillada Somaliland ee la quudarraynayo in ay dalka ka qabsoonto kal-dembe, isaga oo sheegay in uu u taagan yahay xubinnimada labaatanka xildhibaan ee ka sharraxan gobolka Hargeysa.

Musharrax Cabdimajiid Jannogale oo War qoraal ah oo uu maanta Hargeysa kasoo saaray  u qaybiyey warbaahinta ayaa sheegay in kadib markii uu eegay xaallada siyaasadeed ee dalka iyo baahida loo qabo xildhibaanno dhalinyaro ah oo aqoon iyo waayo aragnimo xeel dheer  u leh xaallada siyaasaddeed,  isla markaana uu  door biday in waayo aragnimadiisa ku wajahan baahiyo badan oo uu wax ka qabashadooda xog ogaal u yahay uu go’aansaday in uu isu taago doorashada xubnaha golaha wakiillada ee la filayo sida qorshuhu yahay in ay dalka ka qabsoonto kal dembe 2017-ka haddii alla idmo.

Qoraalka Uu Cabdimajiid Janno-galle u qaybiyey warbaahinta madaxa banaan ee somaliland oo nuqul kamid ahi soo gaadhay Hubaal Media, waxaa uu farriin kooban oo baaq xambaarsan u diray madax dhaqameedka beesha uu kasoo jeedo oo uu ugu baaqay in ay dhex u ahaadaan isla markaana soo dhaweeyaan cid kasta oo han siyaasadeed leh, waxaana qoraalkaasi u  dhignaa sidan:  “ Aniga Oo Ixtiraam Badan U Haya Cuqaasha Iyo Odayaasha Reerka Waxaan Ka Codsanaaya In Ay Dhex U Ahaadaan Musharixiinta Ka Sharaxan Beesha Iyo Cid Kasta oo Han Siyaasadeed Leh, Lana Ilaaliyo Isku Xidhnaanta Beesha Iyo Wada Jirkeeda Taas Ayayana Guusha Reer Ku Jirtaa iyo Tan Qaranka Somaliland , Guul Iyo Gobinimo Ayaan U Rajaynaay Cidkasta Oo Horumarka Iyo Wadda Jirka Ummadda Jecel …..” Ayuu ku Yidhi  Musharax C/Majiid Sh.  Maxamed Ibraahim (Jannogale) Oo Ah Musharraxa U Taagan Doorashadda Golaha Wakiillada Somaliland Kana Sharaxan Gobolka MaroodiJeex.

Madaxweyne Axmed Siilaanyo Oo Tacsi U Diray Ehelada Ay Ka Baxeen Labada Marxuum Ee Xaaji Cabdiraxmaan Gadhyare iyo Axmed Maxamed Xasan Awowo (Axmed Jabaan)

Madaxweynaha Jamhuuriyadda Somaliland, Mudane, Axmed Maxamed Siilaanyo Isagoo ku hadlaaya magaciisa iyo ka shacbiga Somalilandba waxa uu shacbiga ka tacsiyadaynayaa geerida ku timid marxuumiinta kala ah, Marxuum Maxamed Xaaji Cabdiraxmaan Gadhyare iyo Marxuum Mujaahid Axmed Maxamed Xasan Awowo(Axmed Jabaan) oo Taariikhda maanta 28.02.2016 ku geeriyooday magaalada Hargeysa.

Madaxweynuhu wuxuu si gaara tacsidaa ugu dirayaa Qoysaskii, Qaraabadii, Eheladii, Asxaabtii iyo Shacbiga Somaliland ee ay ka bexeen.

Madaxweynuhu waxa uu labada marxuum ku sifeeyey kuwo magac ku lahaa dalka iyo dadkaba, iyagoo kala ahaa halgamaa ka soo qaybqaatay xorayntii wadanka iyo aqoon yahan door muhiima kaga jiray dib u dhiska iyo horumarka dalka.

Madaxweynuhu waxa uu marxuumiintaa ALLE uga baryayaa inuu naxariistii janatu fardawsa ka waraabiyo Qoysaskii, Qaraabadii, Eheladii, Asxaabtii iyo Shacbiga Somaliland ee ay ka baxeena samir iyo iimaan saadiqa ka siiyo.

IN-NAA LILLAAHI WA IN-NAA ILAYHI RAAJICUUN

Cabdiraxmaan Sh. Cilmi Faahiye (Shamax)

      Af-hayeenka Madaxtooyada JSL.

Moscow: Haweenay Madaxa Ka Goysay Wiil Afar Jir Ah iyo Booliska Oo Caafimaadkeeda Baadhaya

Boliiska Moscow ayaa xirdhy haweeneey kadib markii la arkay iyadoo wada madax ilmo laga gooyay. Video ayaa laga arkay haweenayda oo maraysa saldhig tareenka laga raaco meel u dhaw.

Boliiska ayaa qabtay, waxaana la baadhayaa caafimaadka maskaxdeeda. Haweenayda ayaa ka timid Asiyada Dhexe waxanay ahayd qofkii wiilka madaxa laga gooyey hayay.

Waxaa looga shaki qabaa inay dishay ilmaha yar ee ay madaxiisa sidatay ka hor intii aanay dab qabadsiin guriga cida dhashay ilmaha oo ku yaal waqooyi galbeed Moscow. Masuuliyiinta ayaa sheegay in ilmo afar jir ah oo madaxa laga gooyay laga helay guriga dhexdiisa