Gabaygani waa waano, waxsheeg iyo hoga-tus ku socda Guddoomiyaha Xisbiga UCID Engineer Faysal Cali-Waraabe.. Mar haddii tiraabtii lagu joojin kari waayay, bal aan dhinaca tixda ula wareegno.. Wuxu ka hadlayaa waayihii UCID soo maray siday garabkii Aqoonyahan Jamaal Cali Xuseen ee UDUB ka yimi mahuraanka ugu ahaayeen in xisbigu soo baxo sannadkii 2012kii. Waxa curiyay Siciid Maxamuud Gahayr oo ka tirsan Golaha Dhexe ee Xisbiga UCID. Bulshada ayaa magaciisa u bixisay Geylan-dirir.
Wuxuu yidhi
Dhaaxaan sidii guurtiyeed, gaar wax kuu idhiye
Mar haddaan gaddaa aad tihiyo, dhalanku guuraynnin
Waanadu dhegtii aanay gelin, guul-darraa heliye
Gabban maayo maantee bulshadu, way gar-naqaysaaye
Inkastoonad gabayaa ahayn, curiya geeraarka
Qof uun baa wixii kaa gedmada, kuu galgaal-bixine
Bal guddoon adaan Faysalow, kuu gol leeyahaye
Inagoo gawaan iyo fadhina, goobti laga yaacay
Inagoo gujiyo ciil qabnoo, ginina aan haynnin
Golihii WADDANI maalintii, uunku wada gaadhay
Oo gaag yar mooyee khalqigu, geesta kale aaday
Gurmadbaa rugtii UDUB ka yimi, geesi loo qiraye
La’aantood libtaan gaadhnay iyo, gool ma dhalan layne
Gurgurshii ku qaadaad haddeer, gawrac leedahaye
Garabkaaga nimankii ahaa, eedda may geyine
Gacallow waxay mudan yihiin, gool in loo qalo’e
Gargaar bay ahaayeen u kacay, geeshkan reer UCIDE
Naf-hurkuu Jamaal geystay baan, goorna lumahayne
Waa tuu galbeedkana Rashiid, geeyay heegada’e
Cali-gurey xilkiisii gutaan, cidi giriifteene
Guunyiyo adduun bay hureen, gaadha maal badane
Ilamaa Gar-adag bay socdeen, goobta Sool tahaye
Golis iyo dhulkaa Saaxil bay, orod gucleeyeene
Goonyaha Togdheer bay mareen, geylan dirikiiye
Guuraha illaa Awdal baan, gooshnay socodkiiye
Geyigaa Sanaag bay mareen, galab carraabiiye
Adiguna guddoonshow markaad, guul-darrada tiicday
Sidii qaaje orod-gaabiyaad, joogtay gurigiiye
Gaaroodi maad dhaafin iyo, goonyahaa Herere
Gudintaadu waxay saaran tahay, geed-sankii baxaye
Inta aad galoolkii jartaad, beeraysaa gumare
Gedgaddoonku waa kii ku riday, goorihii hore’e
Geeddiga in hore loo wadaa, guusha dhalin-layde
Gadaal-socod adeerow ha noqon, gaaggax yuu imane
Ganddihiyo haddii aanad maqal, guurti lagu reeyo
Gobannimada waad daadisiyo, gaawe sharafeede
Garashadu kaskaagiyo ma aha, geed-ismarintaase
Garaadkayga weedhii qaldani, waanay gelahayne
Golii dhexena waad baal-martee, gooyay xaajada’e
Gurrac baad u socotaa muddana, gooni-daaqnimo’e
Hayska tuurin gebi iyo jardheer, waad ku go’aysaaye