Togdheer, Gabiley, Wajaale iyo Gobollada Galbeedka Oo Laga Soo Dhaweeyay Ansixinta Heshiiska DP World
Hargeysa(Warsugan) Bulshada Somaliland ee gobollada iyo degmooyinka ayaa soo dhaweeyay heshiiska maalgalineed ee dekedda Berbera kaasi oo golaha wakiillada Somaliland dorraad ansixiyeen. Madaxdhaqameed iyo waxgarad ku kala sugan deggaannada Boorama, Gabiley, Hargeysa iyo meelo kale ayaa tilmaamay inay muhiim u arkaan horumarinta dekedda Berbera oo ah tan kaliya ee si rasmi ah uga shaqaysa dekeddaha ku dhereran xeebaha Somaliland.
Suldaan Ibraahin Jaamac Samatar oo ka mid ah madaxda dhaqanka gobolka Awdal oo shalay ka hadlayay kulan madaxda dhaqanku ku soo dhawaysay maalgashiga dekedda ayaa yidhi “Waxaanu isugu nimid oo aanu taageero buuxda u fidinaynaa oo taageeraynaa mashruuca balaadhan ee baryahanba ka socday Somaliland, ee xukumaddu la gashay shirkadda weyn ee caanka ah DP World ee ku saabsan maalgalinta dekedda Berbera. Mashruucaas oo shalay(Dorraad) golaha wakiillada Somaliland ansixiyay ayaanu aad iyo aad u taageeraynaa haddaanu nahay Dhaqankii, odayadii, aqoon yahankii gobolladan Galbeedka Somaliland,” ayuu yidhi Suldaanku.
Maamulka heer gobol iyo heer degmo ee Gabiley iyo ururada bulshada ayaa sidoo kale shir ay Gabiley ku qabteen waxay barbar istaageen heshiiska la ansixiyay ee dekedda Berbera. Maayarka Gabiley Maxamed Aamiin, ayaa sheegay in heshiiska DP World yahay aqoonsi dadban oo Somaliland la siiyay. Waxa uu sidoo kale sheegay In mashaariic kala duwan oo dhinaca horumarka Somaliland ahi barbar socdo maalgalinta dekedda Berbera. Waxaa sidoo kale kulan lagu qabtay Wajaale lagu soo dhaweeyay go’aanka wakiillada ee lagu meel marshay heshiiska DP World.
Badhasaabka gobolka Gabiley ayaa sheegay inuu si weyn ugu faraxsan yahay hirgalinta heshiiska dekedda Berbera. Waxa uu sidoo kale madaxda dhaqanka iyo qaybaha bulshada Gabiley uga mahadceliyay taageerada ay u muujiyeen heshiiska Somaliland iyo Imaaraadka eek u saabsan dekedda Berbera.
Qaarka mid ah hoggaanka dhaqanka Gabiley ayaa sidoo kale soo dhaweeyay heshiiska dekedda Berbera lagu maalgalinayo. Waxay sheegeen inay madaxweynaha Somaliland iyo guddidayada ka soo shaqeeyay uga mahadcelinayaan tallaabada lagu horumarinayo dekedda Berbera oo la rajaynayo inay dhawaan wada maamulaan shirkad Somaliland iyo Imaaraadku wada leeyahay.
Sidoo kalena madaxda dhaqanka gobolka Togdheer ayaa shir balaadhan oo ay Burco ku qabteen waxay golaha wakiillada uga mahadceliyeen sida fudud ee ay u ansixiyeen heshiiska dekedda Berbera “Dekedda Berbera oo in badan ina ruxaysay, hadalkeeduna taagnaa, way inaga soo dhaweeyeen, ansixinta ay ansixiyeena waanu ku taageersanahay, sidii khayrka lahayd ayay sameeyeen,” ayaa ka mid ahaa hadalka madaxda dhaqanka.
“Heshiiska Somaliland iyo shirkadda DP World waanu soo dhawaynaynaa, si niyad sami leh oo aan shaki ku jirin ayaanu u soo dhaweynaynaa, heshiis kasta iyo go’aan kasta oo dalka dani ugu jirtana waanu taageeraynaa. Waxaanu taageersanahay sida baarlamaanku u meel mariyay heshiiska imaaraadka iyo Somaliland. go’aan kasta oo dalka u wanaagsan oo kan dekeddu ka mid yahay ayaanu taageraynaa, golaha wakiilladana waxaanu ku bogaadinaynaa waajibaadkooda ay guteen ee ay ansixiyeen heshiiskaa,” ayaa hadalka odayaasha ka mid ahaa.
Xigasho Wargeyska Warsugan