Xisbiga KULMIYE oo ka Hadlay Abaarta, Isku-dhacii Ciidammada Badda ee Somaliland iyo Jabuuti iyo Cabashada Diiwaangelinta
Hargeysa (Warsugannews)- Xisbal-xaakimka haya talada Somaliland ee KULMIYE, ayaa ka hadlay xaaladaha abaarta baahsan eek a jirta dalka, isku-dhacii dhawaan badda ku dhexmaray ciidammada ilaalada xeebaha ee dalalka Somaliland iyo Jabuuti iyo cabashooyinka diiwaangelinta ee degmooyinka Gabiley iyo Balligubadle.
Afhayeenka xisbiga KULMIYE Md. Xasan Maxamed Cali (Xasan Gaadhaafi), ayaa shir jaraa’id oo uu ku qabtay maanta xafiiska xisbiga, waxa uu sheegay in abaar adagi ka jirto guud ahaan dalka, gaar ahaana gobollada galbeedka oo ay xoog badan tahay, isa markaana xukuumadda KULMIYE ee uu hoggaamiyo Madaxweyne Axmed Maxamed Siilaanyo ay dadaal badan ugu jirto sidii gurmad loo gaadhsiin lahaa dadka iyo xoolaha ku sugan deegaannada abaartu saamaysay.
Md. Xasan Gaadhaafi waxa uu xusay gurmadyada kala duduwan ee xukuumadda iyo dawladaha hoose ee degmooyinka qaarkood fuliyeen oo cunto iyo biyo loogu qaybiyey dad tabaalaysan, isagoo tilmaamay tallaabooyinkii Madaxweynuhu qaadeen ee ay ka mid ahayd magacaabista guddiga gurmadka abaaraha, baaqyadii caalamiga ahaa ee la xidhiidhay taakulo beesha caalamka iyo shacabka reer Somalilandba kaga qaybqaataan gurmad xaaladdan iyo horumarada ilaa hadda laga sameeyey. Waxa kaloo uu si gaar ah uga hadlay dadaallada guddiga gurmadka abaaraha oo dadaalkooda uu u dambeeyey uu ka mid ahaa socdaalkii Madaxweyne-ku-xigeenka Cabdiraxmaan Saylici iyo wefti uu hoggaamiyaa ku tageen Gobolka Awdal oo taakulo cunto ah ay la gaadheen dadka abaartu haleeshay, isla markaana ay halkaasi ka abaabuleen kulan qaadhaan-ururin ah oo la isugu keenay lacag ilaa lixdan kun oo dollar ah
“Abaartu waa aafo Ilaahay keeno, Ilaahay baana qaada oo isaga ayeynu ka sugaynaa inuu innaga dulqaado In Shaa Allaahu, waxaannu leenahay abaartu siyaasad ma gasho, wax siyaasad laga baadhana maaha, cid allaale ciddii rabta inay abaartaa wax ka gaysato gurmadkeeda waa loo baahan yahay. Dawladda Somaliland waxay abaabushay taakulo aad u ballaadhan gudo iyo dibadba oo intii dawlad yar oo itaalkeeda ah aad uga badan,” ayuu yidhi Md. Gaadhaafi.
Waxa kaloo Afhayeenka KULMIYE ka hadlay isku-dhacii dagaal ee dhexmaray ciidammada badda ee Somaliland iyo Jabuuti, waxaannu dhambaal tacsi ah u diray qoyska iyo shacabka Somaliland ee askarigii ku dhintay dhacdadaasi.
Isagoo arrintaa ka hadlayeyna waxa uu yidhi, “Waxa la isku waafaqsan yahay markabkaasi inuu galay biyaha Jabuuti, waxa kaloo la isku waafaqsan yahay in is-rasaasayntu ka dhacday biyaha Somaliland. Cid kasta oo meel wada degan laba qof ilaa dawlado waxa mar walba dhici karta in dhexdooda waxyeelo timaado, laakiin xaalad waliba waxay ku xidhan tahay cidda ay dhexmartaa siday u maamusho, arrintaasi waa mid labada dawladoodba ay ku jiraan oo la dhammaynayo.
Cidda qabta in Jabuuti cadaawad gaar ah u qabto Somaliland aniga iima muuqato meeshay ka keentay, Jabuuti in aanay cadaawad u qabin Somaliland waxa muujinaysa inay safaaradeedii ka furatay magaalo madaxda Somaliland ee Hargeysa, waxay taasi ka turjumaysaa Jabuuti inay diyaar u tahay inay xidhiidh sokeeye oo saaxiibtinimo, walaalnimo iyo jaarnimo diyaar ula tahay Somaliland, xafiiska safaaraddu waa halka waxyaabaha noocaas oo kale markay dhacaan lagaga wadahadlo, markaa Jabuuti waxay soo dhawaysay oo ay inoo keentay meeshii aynu kala xidhiidhi lahayn dawladeeda. Baasaboorka Jabuuti-na dambi maaha ee cidda qaadashadiisa dambi ka dhigaysa, waxaan leeyahay waxaad eegtaan kuwa dalalka Kiristaanka ah ee dad badani sito.”
“Markaa waxaan leeyahay axsaabta mucaaradka halkan tartan doorasho ayaa yaal, waxaannu ku hagaagi karaa iyadoo si xalaal nadiif ah oo ixtiraam leh in loo galo, sidaasi darteed axsaabtu ha iska ilaaliyaan oo ha ka waantoobaan waxyaabaha xanafta leh, dawladda Somaliland iyo xisbigeeda KULMIYE waxay diyaar u yihiin inay dawladaha jaarka ah nabad kula noolaadaan, wixii dhexmarana inay nabad ku xalliyaan,” ayuu yidhi.
Ugu dambayntii, waxa uu sheegay in is-faham laga gaadhay cabashooyin ka soo baxay dadweynaha deegaannada degmooyinka Gabiley iyo Balligubadle oo la xidhiidha diiwaangelinta ka socota iyo duruufaha socodka xadka iyo abaarta saamaysay.
“Sidaynu ognahay diiwaangelinta codbixiyayaashu hadda waxay ka socotaa gobolkii saddexaad ee dalka, gobol walba waxa uu leeyahay muddo 28 maalmood ah. Markaa cabasho ayaa ka timi Balligubadle iyo Gabiley, saddexdii casho ee u dambeeyeyna xisbiyada, masuuliyiinta degaannadaasi iyo Komishankuba waxay ka wadahadlayeen sidii wax looga qaban lahaa duruufahaa yaala gobolladaasi galbeedka ee ku saabsan diiwaangelinta, horta xagga muddada waxay kala siman yihiin gobollada kale oo wax-ka-beddelkeeduna wuxuu saamayn ku yeelanayaa guud ahaan diiwaangelinta, laakiin wax allaale wixii intaa ka sokeeya waxa la isla qaatay wixii fududayn ah ee dadkaasi ay ku gudan karaan waajibaadkooda iyo xuquuqdooda aasaasiga ah ee dastuuriga ah in loo sameeyo, taasna waa lagu heshiiyey oo way dhammaatay,” ayuu hadalkiisa ku soo gunnaanaday Afhayeenka xisbiga KULMIYE Md. Xasan Maxamed Cali (Gaafaadhi).