“Janadii ha waayina” Maanso aan ku xusayo Xuska maalinta shuhadada SNM 17 October oo uu Curiyey
Abwaan Jaamac Faarax Yuusuf (Jaamac Xaad)
Hargeysa(Warsugannews)Halkan waxaan ku soo bandhigayaa maanso la yidhaahdo janadii ha waayina maansadan waxaan curiyey 17/10/2010 waxayna ka hadlaysaa halgankii loo soo maray xoriyada iyo nabada aynu haysano ee aynu ku naaloonayno ogowna akhriste umad kastaa waxay leedahay taariikh taasoo ku suntan dhacdooyinka maalmaha noloshooda samaan iyo xumaan macaan iyo qadhaadh kuu doonoba ha ahaadee,
intii dhimatay faataxada u soo mara in alle naxariistiisii jano ka waraabiyo inana aduunyada ha inoo nimceeyo aakhirana janadiisii ha inoogu deeqo jidka toosanna alle ha inagu hanuuniyo,maansadiina waa tane akhris wanaagsan;
1. xalay baan hurdada cali
2. ma hadree riyada kulan
3. ku arkoo halyeygii
4. lixle lay hor keenoo
5. hoogaansiga salaantii
6. markaan midigta hoo idhi
7. ka dhunkaday hareeraha
8. haye yidhi warka isii
9. waxaan idhi halkee u daran
10. wuxuu yidhi horaysada
11. dadka oo haraadoo
12. hamuun gaajo weyn qaba
13. oo hagardaamo faqashiyo
14. halis cadaw ku sugan baa
15. ii timi hedayduyo
16. sababtaanu hoydee
17. nafta aan u huaray waa
18. dadka himiladiisee
19. halgankii ma midho dhalay
20. inkastoo hanfiga kulul
21. iyo hirig la mariyoo
22. inta haabo loo qoday
23. hurin hirinna loo gubay
24. inkastoo hawada sare
25. heehaabe miig ahi
26. kaga horay rasaasoo
27. dhulka hawsar laba dhacay
28. lagu hagey madaafiic
29. oo kaaraa hadaafaa
30. hagagaar ku dilay badi
31. inkastoo haweenkiyo
32. raga hebeladiisii
33. uu haldoorku maqan yahay
34. inkastoo ay habaqlaha
35. hooyiyo dhasheedii
36. ay kala hadfeenoo
37. ilaa weli la hayn qaar
38. halganki ma midho dhalay
39. haday tahay su’aashaa
40. waxaan idhi lixloow haa
41. kama hadhin jawaabtee
42. hadaan hoos udaadego
43. markay faqash huleeshee
44. laga hiray dalkeenii
45. hoje talo dadweynuu
46. hareer laysu taagyoo
47. dalku haybad calanliyo
48. ciidan heegan iyo lacag
49. dawlad loo hanweynyaa
50. hanaqaaday maantoo
51. hor allee barwaaqiyo
52. nabad baa la haystaa
53. wuxuu yidhi halkaw daran
54. horta yaan ilaawine
55. halyey yusuf garbiye iyo
56. harag waafi koodbuur
57. hanaqaadkii koosaar
58. ma gubtiyo haday tahay
59. ma huraanki cali iyo
60. dayib guray ma haysaan
61. haka yaabin baan idhi
62. intuu hadalkii joojoo
63. hoos u yara xanshaashaqay
64. buu haddana mar kale yidhi
65. ina kaahin ma hamrade
66. dhegaweyne ma hadhsade
67. muuse heegan ii sheeg
68. illaahay ha daayee
69. waxan idhi hormada nool
70. dagaalkii hubaysnaa
71. halkuu manta joogiyo
72. soo gaadhshe heeroo
73. hedu maysan qabanine
74. waa haysanaa weli
75. wuxuu yidhi haddaa xaad
76. gaariye halkuu degay
77. waxaan idhi hargeysaa
78. dhalinyaro hir doogliyo
79. hoobaan la mooduu
80. heer sare iyo jaamacad
81. ku hagaa tacliintoo
82. hadda uu u yahay bare
83. wuxuu yidhi hadraawina
84. waxaan idhi halkiisii
85. bulsho horumarkeeduu
86. hal abuurka maansiyo
87. ku faraa higaadoo
88. heelo ugu sheegaa
89. iyo hadalo dhaxal gala
90. colna hooy kamuu deyn
91. wuxuu yidhi hadaa xaad
92. hooyaday xog iga sii
93. waxaan idhi hoy raaxiyo
94. hadhac bay ku nooshoo
95. dadkay hooyadood tahay
96. haybayaashii beerkiyo
97. hilbkaaga laga jarayna
98. way hareera joogaan
99. wuxuu yidhi hurdiyo dheel
100. kuma dhalato hawl yaroo
101. ruuxna guusha hoo iyo
102. kuma helo fudaydoo
103. hibo looma siiyee
104. lug halbawle go’an iyo
105. boqon heelan laba qaar
106. hanaq saafan beer iyo
107. wadne haadi sidataa
108. libta lagu hantaaye
109. gobanimo ha waartee
110. waa geed hadh weynoo
111. dhiig halyeey ku beermee
112. mar haddaa haleesheen
113. wuxuu yidhi hadday tee
114. hal su’aala oo kale
115. wuxuu yidhi habdhaqankii
116. hidihiyo asluubtii
117. hablihiyo barbaartii
118. dadku weli ma haystaan
119. hadda iyo dhaliilaa
120. anoon hoos u daadegin
121. waxaan idhi iyana haa
122. wuxuu yidhi hiyiga qaran
123. hamigiinu waa maxay
124. waxaan idhi hiyigu guul
125. khayr buu hilaadshoo
126. dhaqaaloo hormara iyo
127. heer saroo la gaadhiyo
128. ictiraaf la helabaa
129. hamigiisu yahay shacab
130. wuxuu yidhi hasheenii
131. madihooshii gabaniyo
132. maatada haweenkiyo
133. ma huraanka gacalkiyo
134. dadku haakah odhan jiray
135. yaa hadhuubka culayga leh
136. haaneedka kala gala
137. horaadada magowga leh
138. yaa ka hoorsha caanaa
139. waxaan idhi hab xulasha
140. hanaan doorashiyo food
141. nidaam lagu heshiiyoo
142. hadba door ninkii helaa
143. guusha loo haneeyaa
144. isagaa horjooguu
145. foofiya horweyntana
146. wuxuu yidhi hugiyo ciil
147. weligaa ha mudanineyey
148. hordhaciyo tusaalaa
149. hawraar af garasho ah
150. hidiyoo is fahannee
151. hadda miiladiisii
152. yey haatan socotaa
153. aan hadalka saafee
154. dalka yaa hogaanshe ah
155. waxaan idhi halyeey qaran
156. halgamaagii weynaa
157. siilaanyaa hor muudoo
158. isagaa hogaanshe ah
159. wuxuu yidhi hufnaaniyo
160. hal adayg dulqaad iyo
161. hibo maamul garashiyo
162. waa hubsiina badanyoo
163. hagarlaawe daacada
164. waan hubaa inuu yee
165. hanbalyaan u dirayaa
166. horta igu salaam kow
167. marka xiga hal aan idhi
168. hadal waano oon faro
169. ha ilaawin gaadhsii
170. aniguna hayaan idhi
171. dugsi aan la hurin iyo
172. waxa tahay hadh damaloo
173. horseedkii la doortee
174. dadka aabahood iyo
175. hooyo uga dhignaayoow
176. booraamo hadimiyo
177. hoga eex ka dhawrsoo
178. hor allee sinaan iyo
179. u hag meesha kharka leh
180. xilkaad manta haysana
181. elle kuguma hawlee
182. dariiqii haboonaa
183. ha ka leexan weligaa
184. iska hubi amaanada
185. hiifka iyo haaraan
186. hebelbaa sidaa yidhi
187. hibashadu ma fiicnee
188. shacabkana hal baan idhi
189. waxa kaa hawira talo
190. muran lagu habsaamiyo
191. ma dhalayska hadalkee
192. ka hadhoo dad weynoow
193. hidisaha wax soo saar
194. hawlaha u midooboo
195. raaca hilinka nololeed
196. hawdiyo hundiyo xeeb
197. hareeraha galbeed bari
198. dadka heelka wada yaal
199. ma hanbaynin waanee
200. adna hoobal gaadhsii
201. hadduu soo bandhigay taa
202. aniguna hayaan idhi
203. dooda oo halaasiya
204. afartii habeenimo
205. hadday tahay abbaartii
206. hadal kooban igu yidhi
207. waa tan hiirtii gaadhee
208. hoygi wacnaaiyo
209. hogaygii nimcadu tiil
210. ayaan haatan aadiye
211. adiguna ha seexane
212. eedaanka hore toos
213. weysada haleeloo
214. ha moogaan cibaadada
215. inta kulahal maashiyo
216. adigiyo halyeeydii
217. noo huray naftoodaba
218. abaal baan u haynaa
219. alla bari had iyo goor
220. duco soo hibaynee
221. hoobaan firdawsiyo
222. janadii ha waayina
223. anna hadal ku gooyoo
224. waxaan idhi hayee nabad
Warsugannews
warsuganmedia@gmail.com
Hargeysa/Office