DIYAARADDII UGU HOREYSAY OO RAKAAB SIDA OO KA CAGO DHIGATAY DEGMADA BAARDHEERE + SAWIRADA
Baardheere (Warsugannews) Ka dib markii Ururka Al Shabaab 22-kii bishii hore ee July lagala wareegay gacan ku haynta Degmada Baardheere ee Gobolka Gedo, ayaa waxaa markii ugu horeysay ka degatay diyaarad rakaab siday.
Diyaaradan oo kuwa yar yar ah, ayaa rakaabka ka qaaday Garoonka Aadan Cadde ee Magaalada Muqdisho, iyadoo gaarsiisay Degmada Baardheere, waxayna rakaab kale ka soo qaaday Degmadaasi.
Dadka reer Baardheere, ayaa sideed sano ka dib waxaa u suurta gashay inay diyaarad si nabdoon kaga raacaan Garoonka Baardheere, sidoo kalana ay rakaab kale kaga soo deggaan.
Diyaaradan waxay noqonaysaa nooceedii ugu horeysay oo rakaab ah oo ka degata Garoonka Degmadaasi, waxaana la fillayaa in diyaarado kale ay rakaab u qaadaan Baardheere, oo ah Degmada ugu weyn ee Degmooyinka Gobolka Gedo.
Ciidamada Ciidamada Dowladda iyo Amisom, ayaa si joogto ah hawlgalo dhanka ammaanka ah kaga sameeya Degmadaasi, waxayna toddobaadkii hore fashiliyen qaraxyo ay sheegeen in ammaanka lagu qalqalin rabay.
