‘DOOB IYO DAREENKII!’ Tix Layaab leh oo uu curiyay Halabuurka da’da yar ee Siddiiq Saxardiid “Taabici”
Tixdan oo la baxday ‘Doob iyo Dareenkii’ waxa curiyay halabuurka da’da yar ee Siddiiq Saxardiid Axmed “Taabici”. Waxay ka hadlaysaa waayaha iyo duruufaha doobnimada. Waxay sawir
ka bixinaysaa xaaladaha kakan ee ku xeeran nolosha kelinimo, iyada oo sidoo kale na iftiiminaysa quruxda ay leedahay nolosha lammaanuhu. Halabuurku waxa uu tixdan ku socodsiinayaa, isla markaana uu si gaar ah ugu soo halqabsanayaa Halabuur Sakariye Saxardiid Axmed “Awaare” oo ay walaalo yihiin, isla markaana isaga da’ ahaan kor uga weyn. Si kooban marka loo yidhaahdana, Siddiiq waxa uu Sakariye ku leeyahay “meesha ka dhaqaaq oo guurso, annana aannu dhiirranno e.” Waxay tixdani daba socotaa maanso uu hore u tiriyay Halabuur Awaare oo la baxday ‘Hadduu kaa baaho dookhu!’.
Maansadu waxay ku ibo furanaysaa:
Dunta wacan abwaankii
Dadnimada lahaayee
Dadku wada tabaayow;
Ummadeenna dayrkii
Darbigaw ahaa iyo
Saxardiid dirkiisow;
Da’deenana tusaaliyo
Dayaxaw ahaayee
Dayashada mudnaayaw;
Dhaqankeena duugga leh
Midka ila daweeyee
Darxumada ka dhawree
Ka ilaasha dumistee
Dummadeeda qaadiyo
Danabkii Awaarow;
Inaad tahay halyay diran
Duunku waa ogsoon yahay
Anna waan ku darayaa
Daacaddii intaan hubo.
Hadal duurxul lay yidhi
Ammin durugsan waa hore
Ayaa maanta duunkiyo
Maskaxdayda duray oo
Niyaddayda daaree;
Saaxiib dabuubtaa
Horta maad dareentaa,
Mise dagamsanaad tahay?
Dunidaynu joognana
Dadku waari maayoo
Wedku wayna dilayaa;
Taariikh ma duubnaa,
Dhal inoo ducaysoo
Diran mayska reebnaa!
Ninka kali ku daalee
Is duuduuba gogoshow,
Raaxo way danbaysaa,
Marwo kula degtaa dhiman,
Ubad diin leh baa maqan,
Aqal aad dalaysiyo
Dugsigaagi baan jirin!
Mise dhaxanta dayreed
Ma dareentid waligaa?!
Haddii aadan daginood
Dermo jiiftid kaligaa
Subaxdiina lagu dirin,
Shaqo doon u soo bixin,
Duhurkii albaabbada
Idilkood lagaa duwin,
Cagta biyo laguu darin,
Qof ku duugayaa jirin,
Wax kastood danaysaba,
Cid diyaarisaa jirin;
Abaar duunya xaaqdoo
Dabadheer la odhan jiray
Ayaa lagu danbaynoo
Raggu wuu dib jirayaa
Hororkiyo dugaaggana
Darisbaydun noqonoo
Waxaad jiifsan doontaa
Hoy daadku soo galo.
Dulucdeeda maansadu
Dul ka xaadis maahee
Arrinkaygu waa daw
Iyo dhawr digniinood.
Dayrow hal baan tabay
Waxaa tahay nin door loo
Cilmi duubay badan oo
Casriyada is daba mara
Iyo dayax gamceeddada
Cirka sare ka soo dega,
Shanta dawladood ee
Loogu deeqay Fiitoo
Waxa uunka dalal jira
Duruus noogu dhigayoo,
Nolosheenna dahabkaa
Inay daawo leedahay
Daliilkeeda noo qoray;
Misna waad danbaysaa.
Xiddigaha dagaarnaa
Dayaxii u soo baxay
Iyo mee dabkii shalay?
Qalbi Laab salaax deday
Wali muu dabayshane
Miyuu daayay heesii
Damqi jiray quluubaha
Iyo doobka aan kicin?!
Cabdisataar miyuu diday?
Codkii muu ka dabar go’ay?
Miyuu daayay wiilkuu?
Guurka ugu ducayn jiray?!
Doodna Ina Saleebaan
Maanuu kuuba soo dirin?
Ma dareemin Dhiganee
Ku dakaynta noloshiyo
Tan dardaarankeedii
Casharkii ku deeqsiin?
Talow may dabooleen?
Awrkii dawaad leba
Ka kalaa ku daydee
Annaguna dayownoo
Dookhiina luminnee
Darka maa bannaysaan?
Siddiiq Saxardiid Axmed “Taabici”
Email: taabici1@gmail.com
Facebook: Sidiq Sahardid Taabici
Burco, Somaliland