Gurmadka Abaaraha: Deegaamo la gaadhsiiyey deeq Biyo ah iyo qaylo-dhaan hor leh
Urrur Qurba-joog ah oo 750 Foosto oo Biyo ah gaadhsiiyey 3 Deegaan oo ka tirsan Gobolada Maroodi-jeex iyo Gabiley..
Hargeysa(Warsugannews)-Deegaamo ka tirsan Gobolada Hargeysa iyo Gabiley oo ay Abaaraha dalka ka jiraa si xun u saameeyeen , ayaa waxa la gaadhsiiyey Kaalmo biyo ah oo ay ku deeqeen xubno kamid ah Jaaliyada reer Somalland ee Wadamada Dibadu.
Kaalmadan oo Ururka Qurba-jooga ee magaciisa la yidhaahdo TOLJIRE ugu talo-galay inay kaga qayb-qaataan gurmadka qaran ee Abaaraha, ayaa deegaamada la gaadhsiiyey waxa kamid ah Degmada Faro-weyne iyo Tuulooyin hoos-yimaada Degmada Gabilay, sida Deegaanka Mataan oo kamid ah meelaha Abaartu sida xun u saameysay bilihii u dambeeyey.
Sidoo kale, waxa deeqda Biyaha ah la geeyey Deegaamada Dacawalay iyo Dacarta oo ka tirsan Degmada Faro-weyne ee Gobolka Maroodi-jeex, kuwaasoo iyagana ay ka jirtay Biyo iyo Raashin la’aan xooga oo Dad iyo Duunyaba hagaasisay.
Munaasibado gooni-gooni ah oo loo sameeyey wareejinta deeqdan, ayaa Deegaan walba Odayaasha iyo Waxgaradka waxa lagu guddoonsiiyey Kaalmada loogu talo-galay, iyadoo fulinta howshaas Ururku u soo wakiishay Muwaadiniin dalka gudihiisa jooga, waxaana Xajmiga guud ee deeqdu ahayd 750 Foosto oo Biyo ah, taasoo deegaan walba qayb la gaadhsiiyey.
“Deeqdan waxa soo diray Ururka Qurbo-joogta ee TOLJIRE oo kaga qayb-qaadanaya gurmadka Abaaraha. Deegaanka Mataan waxa la geeyey 3500 Foosto oo Biyo ah, Dacarta 250 Foosto, bulshada reer dacawaleyna Ururku ku wareejiyey 150 Foosto” sidaas waxa sheegtay Ifraax Maxamuud Sh. Yuusuf oo Ururku ku soo hagaajiyey Kalmada. “abaar aad iyo aad u xun ayaa ka jirta Dalka, Xoolo iyo dadba waa Abaar saameysay” ayey ku dartay Ifraax hadalkeeda iyadoo ka hadlaysay Deegaanka Mataan.
Odayaasha iyo Waxgaradka deegaamadaas oo iyaguna xafladaha lagu wareejiyey Mucaawimada hadalo ka jeediyey, ayaa si mug leh uga mahad-naqay gurmadka loo fidiyey oo ay sheegeen inay baahi weyn u qabeen, iyagoo geesta kalena tilmaamo ka bixiyey Baahiyaha kale ee jira Deegaamaddooda, oo ay qaar abaaruhu dhaliyeen iyo qaar horeba u jiray oo ay kamid yihiin baahiyaha adeegyada aasaasiga ah, sida Caafimadka, Waxbarashada iyo Biyaha.
“baahidu maaha biyo qudha ee waxaanu u baahanahay oo noogu daran Raashin, Daawo iyo Caweys la siiyo xoolaha yar ee soo hadhay” sidaas waxa yidhi Guddoomiye k-xigeenka Tuulada Dacawaley, Axmed-yaasiin Qudh oo ka hadlayey Xaflada lag wareejiyey Taakulada, isagoo intaas raaciyey “Xaalada dadka iyo Xooluhuba aadbay u liidataa” ayuu yidhi isagoo dhinaca kale u mahad naqay dadka Qurbo-jooga ah ee Kaalmadan u soo diray.
Dhinaca kale, Odayaasha iyo Waxgaradka Deegaanka Dacarta oo ka hadlay xaflada guddoonsiinta Deeqda, ayaa Guddida Abaaraha Qaranka ugu baaqay inay Raashin iyo Daawooyin soo gaadhsiiyaan Dadka ku dhaqan Deegaankan, iyagoo tilmaamay in dhibaatada ugu daran ee iminka Degmada ka jirtaa ay tahay cunto yaraan. “Biyahaas iminka naloo keenay waxa laga yaabaa in Guryaha qaarkood aanu oolin raashin lagu karsadaa, markaa dawladda iyo Shicib wixii wax nagu tari kara waxaanu leenahay waar waanu bakhtiyeynaa ee noo soo gurmada” ayuu yidhi Oday Maxamed Xuseen Xaaji (Jab-libaax) oo kamid ah Odayaasha Deegaanka Dacarta.
Saleban Abdi Ali
Email: curad1986@hotmail.com