Xisbiga KULMIYE oo Qaabilay Xildhibaanno iyo Taageerayaal ka soo jeeda Degmooyinka Qori-lugud iyo Wadaamo-goo oo ka soo Digo-rogtay WADDANI
Hargeysa (WSN)- Hoggaanka xisbul-xaakimka Somaliland ee KULMIYE, ayaa soo dhaweeyey xildhibaanno iyo taageerayaal ka soo jeeda degmooyinka Qorilugud iyo Wadaamo-goo, kuwaas oo kasoo digo-rogtay xisbiga mucaaradka ah ee WADDANI oo ay hore uga mid ahaayeen.
Xaflad ballaadhan oo lagu qaabilay xildhibaannada iyo taageerayaashooda oo lagu qabtay huteelka Guuleed ee magaalada Hargeysa, waxa ka qaybgalay xubnaha hoggaanka xisbiga oo uu hormood u ahaa Guddoomiye-ku-xigeenka kowaad ee xisbigaas Md. Maxamed Kaahin Axmed, wasiiradda Wasaaradaha Xannaanadda Xoolaha iyo Hawlaha Guud iyo Guriyeynta, hoggaanka garabyada xisbiga ee heer gobol, haweenka, xildhibaanadda cusub ee xisbiga ku soo biiray iyo taageerayaashooda iyo marti sharaf kale oo aad u tiro badan.
Guddoomiyaha Gobolka Maroodi-jeex ee xisbiga KULMIYE Md. Maxamed Iid Dhimbiil oo halkaas ka hadlay, ayaa soo dhaweeyey xildhibaanada cusub, waxaanu hoosta ka xariiqay inay yimaadeen xisbi loo siman yahay oo aan la kala lahayn.
Xildhibaan Axmed Xandulle Muuse oo ka mid ah xildhibaannada Golaha Deegaanka Degmada Qorilugud ee ku soo biiray KULMIYE, ayaa shaaca ka qaaday inuu ku qancay hoggaaminta iyo siyaasadda xisbiga KULMIYE, isla markaana ka qancay kasii mid ahaanshihii xisbigii uu ka yimi ee WADDANI kadib markii uu musuq iyo wax is-dabamarin badani ka dhacay shirkiisii golaha dhexe ee dhawaan qabsaday.
Sidoo kale, Xildhibaan Mustafe Aadan Maxamuud, Xildhibaan Cali Cabdillaahi Maxamed iyo Xildhibaan Xirsi Raygal Maxamed oo dhammaantood ka mid ahaa xildhibaannada ku biiray KULMIYE, ayaa iyaguna si isku mid ah u sheegay inay maal iyo muruqba la garab istaagi doonaan xisbiga KULMIYE, isla markaana ummaddooda iyo deegaamadoodaba ku sii fogayn doonaan waxqabadka la mahadiyey ee xisbiga KULMIYE.
Chief caaqil Cali Aadan Afku-waranle oo ka mid ah hormoodka cuqaasha deegaanada Wadaamo-goo iyo Qorilugud oo madasha ka hadlay, ayaa tilmaamay in deegaanada uu dhalasho ahaan ka soo jeedaa si siman u taageersan yihiin xisbiga KULMIYE, sidaas darteedna, xubnaha xildhibaanada ee haatan ku soo biiray ugu dambeeyeen cid deegaanadaas ka soo jeeda oo KULMIYE taageerta, waxaannu yidhi, “Annagu meeshaanu raacno Ilaahay waa guuleeya, Ilaahayna waxaannu ka rajaynaynaa inuu KULMIYE guulaysan doono, waxa uu xisbigu qabtayna wax qarsoomaya ma ahee taariikhdaa qoraysa.”
Xildhibaan Axmed Yaasiin Sh. Cali Ayaanle iyo Xildhibaan Maxamed Jaamac oo labaduba ka tirsan Golaha Wakiillada ee xisbiga KULMIYE, ayaa soo dhaweeyey xildhibaannada iyo taageerayaasha ku biiray KULMIYE.
“Dadku waa tartamayaa, laakiin xisbiga WADDANI dacaayadda iyo barobagaandhada badan ee ay wadaan ha joojiyaan, ololuhuna wuu furan yahay, rag badan oo meelo khatar ah taabanayaana way jiraan,” ayuu yidhi Xildhibaan Maxamed Jaamac.Guddoomiyaha Golaha Dhexe ee xisbiga KULMIYE Md. Jaamac Ismaaciil Cige (Shabeel) oo halkaas ka hadlay, ayaa si weyn u soo dhaweeyey xildhibaannada iyo taageerayaasha ka soo jeeda degmooyinka Qorilugud iyo Wadaama-goo, isagoo dhinaca kalena jawaab adag ka bixiyey hadallo deelqaaf ahaa oo ka soo yeedhay siyaasi Ismaaciil Hurre Buubaa oo xisbiga WADDANI katirsan, waxaannu yidhi “WADDANI siyaasiyiintii ku soo biiray Afsoomaali gaboobay bay ku hadlaan iminka oo 20 sanno la soo dhaafay, innaguna 20 sanno dib uma noqon karno, hadalka abtigay Ismaaciil Buubaa kasoo yeedhayna anigaa uga jawaabayee abtigay 20 sanno ayuu waddanka ka maqnaa waddanka berigii maleeshiyada iyo maro-aloolka la ahaa ayaa waddanka ugu dambaysay, waxaanse leeyahay abtiyow maleeshiyadii iyo Maro-aloolkiiba KULMIYE ayey ku dhan yihiin oo adiga ayuun baa ka maqan.”Wasiirka Wasaaradda Xannaanada Xoolaha Cabdilaahi Maxamed Daahir (Cukuse), ayaa sheegay in baaxadda taageerayaasha iyo xildhibaanada ku soo biiray xisbiga KULMIYE muujinayso inay soo dhawaatay guushii xisbigu, isaga oo erayo siyaasadeed ka daba tuuray wasiirkii hore ee ee Madaxtooyada oo ay wakhti siyaasadda isku jaal ku ahaan, “Waxaan is leeyahay guusha KULMIYE shaki kuma jiro ninkii shaki ku jirowna aniga uun i eeg shakigu hakaa baxee, aniguba saaxiibkay Xirsi beri buu dadka ugu dheeraa, Cali-marreexaan kaa wuu ka dheeraa, Maxamuud Xaashi wuu ka dheeraa, laakiin markaanu dibadda nimi baan arkay inuu qof caadi ah yahay,” ayuu yidhi wasiir Cukuse.Wasiirka Wasaaradda Hawlaha Guud, Gaadiidka iyo Guryeynta Somaliland Md. Cali Xasan Maxamed (Cali-marreexaan), ayaa isaguna soo dhaweeyey xubnaha cusub ee xisbiga ku soo biiray, waxaannu hoosta ka xarriiqay inay cudud iyo cuudba tari doonaan xisbiga KULMIYE, waxaannu yidhi, “Ujeeddadeenu waa ololaa soo socdaa halkii la is yidhaahdo rag baa ku maqan iyo gol-daloolay noqon kartaaba waa la giigiijinayaa, maanta deegaanadaas aad kasoo jeedaan cid innagaga maqani ma jirto, dadkii ummadda u talinayey haddii ay madax siyaasadeed tahay iyo haddii ay madax dhaqan tahay waa lagu dhanyahay xisbiga, kuwii idinka soo horreeyeyna la mid baad tihiin oo isku meel baad joogaan.”Ugu dambayntii waxa madasha soo gunaanaday Guddoomiye-ku-xigeenka koowaad ee xisbiga KULMIYE Md. Maxamed Kaahin Axmed, waxaannu si kal iyo laab ah u soo dhaweeyey xildhibaanada cusub ee xisbiga ku soo biiray, isagoo tilmaamay in xisbiga KULMIYE taaariikhda Afrika ku galay barnaamij waxqabad oo qoran oo bulshada la soo hordhigay, kadibna hirgeliyey, “Xisbiga KULMIYE wax aan lagula murmayn baa jira oo waa xisbiga kaliya ee dalkanna soo maray, lagana yaabo inay dalalka Afrika ay ku dhif tahay ee intuu barnaamij siyaasadeed sameeyey bulshada la hortagay, haddana barmaanijkii fuliyey, barnaamijka siyaasadeed ee KULMIYE waxa ka mid ahaa in shaqaalaha mushaharkooda la kordhiyo, in ciidamada derejooyinkoodii la siiyo, in shaqaalaha tiradooda, tayadooda iyo dhaqaalahooda la kordhiyo oo waddooyinka dalka qayb weyn laga qaato. In la furo axsaabta siyaasiga ah waxa hal abuurkeeda lahaa KULMIYE, waana xisbi hoggaankiisa iyo qurbe-jooggiisuba yihiin qaar odorosaya hal-abuur siyaasi ah iyo mid dhaqaaleba oo mustaqbalka dadka waxtara,” ayuu yidhi Md. Maxamed Kaahin.
